السلام عليكم ورحمة الله وبركاته
اليوم راح اتكلم شوي عن تجربتي مع صبغة الشعر
اول شي الصبغة اللي استخدمتها (ديكسون) باللون اشقر رمادي فاتح، تقريباً مثل هذي الصورة :
أو هذي :
طبعاً بما اني اول مرة أصبغ شعري، وشعري الأساسي لونه بني، اللي بالمحل قال لي احتاج مانع اصفرار.
هذي الصورة فيها بالترتيب من اليسار لليمين : الصبغة، مانع الاصفرار، الاوكسجين.
سعرهم كلهم تقريباً بـ ٥٥ ريال، متوفرين عند محلات الجوهي.
طبعاً مانع الاصفرار بدون لون بس تخلطينه مع الصبغة، لونه لما تحطينه بنفسجي بس ما يأثر ع الصبغة، بس ع شان ما يتحول شعرك للون الأحمر.
لأن لو تحول للأحمر مصيبة!!
حطيت من كل شي نص الكمية ومزجتهم مع بعض.
اختي صبغت لي شعري من تحت لفوق لأن الجذور تاخذ اللون بسرعة.
خليت الصبغة ع شعري نص ساعة وبعدين حطيت فوقها بلسم قبل ما اغسلها ع شان يثبت اللون وتركته دقيقتين.
غسلت شعري بالشامبو حسيته صار خشن واجد!
رجعت حطيت بلسم بعد الغسيل ع شان ارطبه، والحمدلله ما رجع صار خشن، بس أول غسلة صار كذا، الايام الثانية الحمدلله زي قبل ما اصبغه.
من ناحية اللون صار حلو بس اغمق من اللي أبغاه، ما عدا الجذور.. صار لونها أحمر ع برتقالي... صدمة!!!
اليوم الثاني ما تحملت قلت لازم اغطي الجدور يعني اغطيها، ولو ان الصبغة تضر بالشعر خصوصاً وقت تكون متكررة ويوم ورا الثاني، بس الجذور غير محتملة.
صبغت الجذور اشقر رمادي غامق وخليتها ١٠ دقايق بس، لكن للأسف ما تغطى اللون بالكامل وظل في احمرار، لكن يومين وحسيت عليه خف، وان شاء الله يختفي مع الزمن، لأن الشعر أول ما ينصبغ يصير فاقع ويهدا اللون شوي شوي.
ما كنت مقتنعة فيه بس ظليت ساكتة لأن مستحيل اصبغ كل يوم، شعري راح ينهد!
بس اللي شافوه تختلف وجهات نظرهم والحمدلله الاغلب قالوا انه حلو ويناسبني.
